أول رشوة في حياتي ..

أول رشوة في حياتي ..

--------------------------------------------------------------------------------



يا هلا بالجميع ...
بصوا هو موضوع مش مهم يعني .. بس أنا حبيت بس زي ما بيقولوا :
to get off my chest

النهاردة كان يوم مختلف و تجربة جديدة في حياتي ..

يعني الواحد من الأسبوع الي فات من أول ما استلم شهادة التخرج و حاسس إنه "بقى راجل" و نازل في مشاوير كل يوم علشان يخلص ورق الكلية و الجيش قبل رمضان و الصيام و الحر و الذي منه

بس على مين ؟؟ دي حكومة يابا .. يعني أسبوع لوحده مش كفاية ,

المهم كان آخر المطاف الخميس اللي فات كنت بعمل "الفيش" -اللي يقولوا عليه في التلفزيون : فيش و تشبيه - و وقفت على الشباك ساعتين و شوية و الآخر "حصّول"= "حضرة الصول" قفل الشباك و قال خلاص .. شطبنا ..

طبعا الواحد كان واقف في الطابور و عشرميت واحد بيخلصوا الورق من بره الطابور عادي ..
فالواحد دمه اتحرق بس هيعمل ايه ؟؟
قال ربنا يسهل و "نعاود الكرة" يوم السبت ..

المهم امبارح قابلت واحد زميلي من اللي كشفوا جيش نص أول و بقول له على حكاية الفيش دي ..

فقال لي يابني طابور ايه ؟؟ ده "للفلاحين" بس اللي مش عاوزين يدفعوا - مع احترامي الشخصي للفلاحين اللي أنا منهم و والداي كذلك - , انت تدخل جوة و "تأبج" الراجل من تحت لتحت كده و هو هيخلص لك الورق على طول ..
قلت له يا راجل ؟؟ أحسن يكون مش بياخد و يفضحني .. ده احنا في القسم .. يعني هتبقى مش أي رشوة .. رشوة واحد في الداخلية ..
قال لي يابني ده ورق القسم كله كده ..
لو مش عاوز خلاص .. بس ابقى قابلني لو عرفت تخلص الورق بقى ... و لو خايف تديله الفلوس عدي ليا و انت رايح أروح معاك أديله أنا .. دي حاجة بسيطة ..

المهم قلت له طيب ..

جيت النهاردة صحيت متأخر شوية .. و قلت مش هعدي على حد .. أنا هروح لوحدي ..
و رحت لابس الحتة اللي على الحبل و قميص أبيض و حاطط "كَلونيا" علشان أجبر نفسي ما أقفش في الطابور و اتبهدل ,

و رحت ....

المهم كالعادة لقيت الطابور الطويل العريض .. بس أنا ناوي خلاص .. كفاية علسا الساعتين الفشنك بتوع يوم الخميس ..
و رحت داخل جوة على طول ..
المهم وقفت مش عارف أقول ايه .. و فيه ناس كتير "بتبصم" جوة بعد ما يخلصوا الطابور بره ..

بعدين لقيت واحد معات 2 جنيه و حاططهم باينين كده و بيقول له .. قال له لف من الطابور ..

قلت قشطة , هيقول لي لف انا كمان .. بس أنا قلت يمكن علشان كانوا 2 جنيه أو كانوا باينين و الناس شايفينه ..

المهم قلت أنا عمري ما هقف في الطابور ده تاني .. رحت حاطط ال5 جند في وسط الورق و مبين طرفها بس -معلم قديم- بحيث هو بس اللي يشوفه ...
و طبعا عينك ما تشوف الأدرينالين و العرق و دقات القلب و ايدي اللي بترتعش ...
و قلت له معلش يا باشا أنا جيت الخميس و اتبهدلت و .... و كلمتين كده علشان الناس اللي واقفة بس , و لمح الفلوس قال لي طيب

رحت مديله الورق و أنا ايدي بترتعش طحن , أنا حسيت إنها باينة قوي و هي بترتعش ....
و هو عرف يطلع الفلوس منه من غير ما حد ياخد باله ...

و اديتله ايديا الاتنين و " بصّمني يا معلم" .. و في أقل من 5 دقائق كان كله تمام ..

و لا تقول لي طابور و لا ساعتين و نص ..

و دي كانت أول رشوة أديها في حياتي ... بس أتوقع إن الجايات أكتر من الرايحات !!!

لأن لسة فيه 2 فيش تانيين عاوز أخلصهم ... و هيبقوا في رمضان و مش عارف ايه الظروف بقى ؟؟ !!!

بس أنا حاسس بشوية ذنب , بس أنا برضه معذور .. ما أنا ما أخدتش حق حد بالطريقة دي .. ده أنا باخد حقي اللي ما عرفتش آخده بعد ساعتين وقفه في الطابور ..
يعني أعمل ايه يعني ؟؟

جتها نيله حكومة بنت "هوند" - ترجمها لوحدك -

و إلى اللقاء في رشاو.... قصدي في فضفضات أخرى ..